By:Hassan Pojjo
Madrid Queens na Okota Starlets zimetoshana nguvu kwa sare ya bila kufungana (0-0) katika mechi ya kusisimua ya Ligi ya Wanawake ya Mombasa iliyochezwa kwenye Uwanja wa Mbuzi, Kongowea, Mombasa.
Mchezo huo ulikuwa wa ushindani mkubwa huku timu zote mbili zikionyesha kiwango cha juu cha nidhamu, mbinu na ari ya kutafuta ushindi. Pande zote zilitengeneza nafasi kadhaa za kufunga, lakini ukosefu wa umakini katika umaliziaji uliwafanya washindwe kuvunja ukuta wa mabao.
Madrid Queens walionekana kutawala sehemu kubwa ya mchezo kwa kumiliki mpira na kuanzisha mashambulizi ya mara kwa mara. Hata hivyo, safu ya ulinzi ya Okota Starlets ilisimama kidete na kufanikiwa kuzima mashambulizi yote yaliyoelekezwa langoni mwao.
Kwa upande wao, Okota Starlets walitegemea mashambulizi ya kushtukiza yaliyowapa nafasi nzuri za kufunga, lakini walishindwa kuzitumia kutokana na umaliziaji usioridhisha mbele ya lango.
Makipa wa timu zote mbili walikuwa katika kiwango cha juu, wakifanya save muhimu zilizowazuia wapinzani wao kupata bao na kuhakikisha mchezo unamalizika kwa sare tasa.
Matokeo hayo yanaifanya kila timu kujikusanyia alama moja muhimu katika mbio za kuwania nafasi nzuri kwenye msimamo wa Ligi ya Wanawake ya Mombasa, ambayo imeendelea kushuhudia ushindani mkali kati ya klabu mbalimbali za wanawake jijini Mombasa.
Licha ya kutopatikana kwa mabao, mashabiki waliohudhuria waliburudishwa na mchezo uliokuwa na kasi, ushindani na kiwango kizuri cha soka, hali inayoendelea kudhihirisha ukuaji na maendeleo ya soka la wanawake katika Kaunti ya Mombasa.
Timu zote mbili sasa zitaelekeza nguvu zao kwenye mechi zijazo zikiwa na matumaini ya kurejea katika njia ya ushindi na kuimarisha nafasi zao kwenye msimamo wa ligi.
