By:Hassan Pojjo
Hali ya taharuki ilitanda katika eneo la Chaani, Kaunti ya Mombasa, baada ya watu watano, akiwemo mtoto mmoja, kukamatwa na maafisa wa polisi kwa tuhuma za kuhusika na kundi linaloshukiwa kuendesha mafundisho yanayodaiwa kupotosha waumini.
Tukio hilo lilizua mshangao mkubwa miongoni mwa wakazi baada ya watuhumiwa hao kuonekana wakitembea bila nguo katika baadhi ya barabara za eneo hilo. Kitendo hicho kiliwavutia wananchi wengi waliokusanyika kushuhudia tukio hilo huku wengine wakitoa taarifa kwa maafisa wa usalama.
Kwa mujibu wa mashuhuda, watuhumiwa hao walionekana wakitembea kwa utulivu bila kuonyesha dalili za hofu, jambo lililozua maswali kuhusu mazingira yaliyosababisha kitendo hicho. Baadaye, maafisa wa polisi walifika eneo la tukio na kuwakamata kwa ajili ya uchunguzi.
Polisi wamesema uchunguzi unaendelea kubaini iwapo watuhumiwa hao wanahusishwa na kundi linaloendesha mafundisho yanayokiuka sheria au kama kuna watu wengine waliohusika. Mtoto aliyekuwa miongoni mwa waliokamatwa amewekwa chini ya ulinzi na anatarajiwa kupatiwa huduma zinazostahili kwa mujibu wa sheria.
Tukio hilo limezua wasiwasi miongoni mwa wakazi wa Chaani, ambao wamezitaka idara za usalama kuongeza ufuatiliaji wa makundi yanayoshukiwa kuwapotosha wananchi na kuhatarisha usalama wa jamii.
Hadi kufikia wakati wa kutayarishwa kwa taarifa hii, polisi hawakuwa wametoa taarifa rasmi kuhusu utambulisho wa watuhumiwa hao wala chanzo cha tukio hilo, wakieleza kuwa uchunguzi unaendelea na hatua zitachukuliwa kulingana na matokeo yake.
