By:Hassan Pojjo
Naibu Gavana wa Kaunti ya Mombasa, Francis Foleni Thoya, amefanikiwa kukamilisha safari ya baiskeli ya kilomita 113 kutoka Mombasa hadi Kaloleni na kurejea, akieleza kuwa ilikuwa safari ya changamoto kubwa lakini yenye manufaa makubwa kwa afya na ustahimilivu wa mwili.
Akizungumza baada ya kumaliza safari hiyo, Thoya alisema licha ya umbali mrefu na mazingira yenye changamoto barabarani, alifanikiwa kuikamilisha kwa mafanikio. Alisisitiza kuwa mazoezi ya mwili ni muhimu katika kuboresha afya na kuwahimiza wananchi kujenga utamaduni wa kushiriki michezo na shughuli za mazoezi mara kwa mara.
Safari hiyo imeonyesha dhamira ya Naibu Gavana huyo ya kuhamasisha maisha yenye afya kupitia uendeshaji wa baiskeli. Thoya amekuwa mshiriki wa safari mbalimbali za masafa marefu, hatua inayomfanya kuwa miongoni mwa viongozi wanaotumia vitendo kuhamasisha jamii kuhusu umuhimu wa afya bora na mazoezi.
Wadau kutoka sekta mbalimbali wamempongeza kwa mafanikio hayo, wakisema ameonyesha mfano wa uongozi unaochochea nidhamu, uvumilivu na mtindo bora wa maisha. Wameeleza kuwa viongozi wanaoshiriki shughuli za aina hii hutoa hamasa kwa wananchi kujali afya zao kupitia mazoezi ya mara kwa mara.
Safari hiyo pia imezua hamasa mpya miongoni mwa wapenzi wa mchezo wa baiskeli katika ukanda wa Pwani, huku wengi wakisisitiza kuwa mazoezi ya aina hiyo yana mchango mkubwa katika kupunguza magonjwa yasiyoambukiza na kuboresha afya ya jamii kwa ujumla.
