By:Robert Mutasi
Watetezi wa haki za binadamu katika Kaunti ya Uasin Gishu wanataka uchunguzi huru na wa kina kufanyika kuhusu utendaji kazi wa Mkuu wa Kituo cha Polisi cha Eldoret Central, Chief Inspector James Lenaso, kufuatia tuhuma nzito zinazomkabili.
Watetezi hao, wakiongozwa na Kimutai Kirui kutoka shirika la Centre Against Torture na Juma Akumu wa Eldoret Social Justice Centre, wamesema wamewasilisha malalamiko rasmi kwa Ofisi ya Inspekta Jenerali wa Polisi, wakimtaka achukue hatua za haraka kubaini ukweli wa tuhuma hizo.
Kulingana na malalamiko hayo, OCS huyo anatuhumiwa kwa madai ya matumizi mabaya ya madaraka, kuchapisha picha na taarifa za watuhumiwa kwenye mitandao ya kijamii kinyume na sheria, pamoja na madai ya kuomba pesa kutoka kwa baadhi ya washukiwa ili kuwaachilia au kuwasaidia kupata dhamana.
Kirui alisema tabia ya kuchapisha taarifa za watuhumiwa mtandaoni kabla ya kufikishwa mahakamani ni ukiukaji wa haki za binadamu na inakiuka kanuni za uendeshaji wa haki.
“Tumeona wasiwasi mkubwa kuhusu jinsi baadhi ya watuhumiwa wanavyoshughulikiwa katika kituo cha Eldoret Central. Kuweka picha za watu wanaoshukiwa makosa kwenye mitandao bila kufuata utaratibu wa kisheria ni kudhalilisha na kukiuka haki zao za kikatiba,” alisema Kirui.
Kwa upande wake, Juma Akumu wa Eldoret Social Justice Centre alisema wanataka uchunguzi ufanyike kwa uwazi ili kubaini iwapo madaraka ya kipolisi yalitumiwa kwa mujibu wa sheria na taratibu zilizowekwa.
“Tunataka uchunguzi huru. Tunataka kujua kama sheria ilifuatwa. Kama kuna makosa yamefanyika, hatua zichukuliwe. Hatupaswi kuwa na polisi wanaotumia cheo chao kujinufaisha,” alisema Akumu.
Watetezi hao wamesema baadhi ya wananchi wamewasilisha malalamiko kwao wakidai kuombwa pesa kituoni humo ili kesi zao zisongeshwe au watuhumiwa kuachiliwa kwa dhamana ya polisi, jambo ambalo kama ni kweli, linachafua taswira ya Jeshi la Polisi.
Wamesema lengo lao sio kumchafua afisa yeyote, bali kuhakikisha uwajibikaji na kuheshimiwa kwa utawala wa sheria.
Wakati huo huo, Kamanda wa Polisi wa Kaunti ya Uasin Gishu, Wilberforce Sicharani, alipoulizwa kuhusu malalamiko hayo, alisema hadi wakati huo alikuwa bado hajapokea barua rasmi ya malalamiko, hivyo hakuwa katika nafasi ya kujibu tuhuma hizo moja kwa moja.
“Sijaona malalamiko hayo. Sijapokea chochote rasmi, kwa hivyo siwezi kujibu kwa sasa. Lakini taratibu zipo, na kila malalamiko tukipokea tunauchunguza,” alisema Kamanda Sicharani.
Ni muhimu kutambua kuwa tuhuma zinazomkabili OCS huyo bado hazijathibitishwa na bado ni tuhuma tu hadi uchunguzi utakapokamilika na hatua za kisheria kuchukuliwa iwapo itabainika kuna ukiukaji.
Watetezi hao wamesema wataendelea kufuatilia suala hilo kwa karibu na kuhakikisha haki inatendeka kwa pande zote mbili — kwa wananchi na kwa polisi.
Wamewataka wananchi ambao wamedhulumiwa au kuombwa pesa kituoni hapo kujitokeza na kutoa ushahidi kwa vyombo huru vya uchunguzi bila woga.
