By:Hassan Pojjo
Mwenyekiti wa Kundi la Vijana la International Republican Institute (IRI) Mombasa, Hassan Mbangwe, ameongoza ujumbe wa vijana kutoka Kaunti ya Mombasa kushiriki kikao cha siku mbili cha mafunzo na kubadilishana uzoefu kilichofanyika mjini Naivasha, kikihusisha wajumbe kutoka kaunti za Mombasa na Kakamega.
Mafunzo hayo yaliyoandaliwa na International Republican Institute (IRI) yaliwakutanisha viongozi wa makundi ya vijana, maafisa wa serikali za kaunti wakiongozwa na Ofisi ya Katibu wa Kaunti na Mkuu wa Utumishi wa Umma wa Kaunti ya Mombasa, Wajumbe wa Bunge la Kaunti (MCAs), pamoja na wawakilishi wa mashirika ya kiraia (CSOs) wakiongozwa na Zeddy Adika.
Washiriki walitathmini utekelezaji wa shughuli mbalimbali zilizofanywa tangu mwaka 2024, wakijadili mafanikio yaliyopatikana, changamoto zilizojitokeza na mbinu bora za kuimarisha utawala bora, uwajibikaji wa viongozi, ushiriki wa wananchi katika maamuzi ya maendeleo na nafasi ya vijana katika uongozi.
Akizungumza wakati wa kikao hicho, Hassan Mbangwe alisema mafunzo hayo yameimarisha ushirikiano kati ya kaunti mbalimbali na kuwajengea vijana uwezo wa kushiriki kikamilifu katika masuala ya utawala na maendeleo ya jamii. Alieleza kuwa kubadilishana uzoefu kati ya Mombasa na Kakamega kumedhihirisha kuwa ushirikiano kati ya serikali za kaunti, mabunge ya kaunti na mashirika ya kiraia ni msingi muhimu wa kujenga utawala unaozingatia uwazi, uwajibikaji na ushirikishwaji wa wananchi.
Mbangwe aliishukuru International Republican Institute kwa kuendelea kuwekeza katika maendeleo ya vijana kupitia mafunzo ya uongozi, programu za kujenga uwezo na majukwaa ya kubadilishana uzoefu ambayo yanawaandaa kuwa viongozi wenye maadili, uwezo na maono ya kuleta mabadiliko chanya katika jamii.
Aidha, alisema kikao hicho kinaashiria pia hitimisho la kipindi chake cha miaka miwili kama Mwenyekiti wa Kundi la Vijana la IRI Mombasa. Alieleza matumaini kuwa misingi iliyowekwa, mahusiano yaliyojengwa na maarifa yaliyopatikana yataendelea kuwa chachu ya kuimarisha utawala bora na kuongeza ushiriki wa vijana katika nafasi za uongozi na maamuzi ya maendeleo.
Washiriki wa mkutano huo walisisitiza umuhimu wa kuendeleza ushirikiano kati ya vijana, serikali za kaunti na mashirika ya kiraia ili kujenga utawala unaowajibika, unaoshirikisha wananchi na unaochochea maendeleo jumuishi na endelevu kwa manufaa ya vizazi vya sasa na vijavyo.
