By:Hassan Pojo
Wito umetolewa kwa vijana na wakazi wa Wadi ya Chaani, katika Eneo Bunge la Changamwe, Kaunti ya Mombasa, kuipa kipaumbele elimu na mafunzo ya ujuzi kama njia ya kujenga maisha bora na kujikwamua kiuchumi.
Akizungumza katika eneo hilo, Mwakilishi wa Wadi ya Chaani, Frankline Makanga, maarufu kama Hossana, amesema kuwa elimu na ujuzi wa kiufundi ni nguzo muhimu za kuwawezesha vijana kujitegemea na kupunguza ukosefu wa ajira.
Hossana amewahimiza wakazi kujitokeza kwa wingi kujiandikisha kwa mafunzo ya ujuzi yatakayoanza katika siku chache zijazo. Amesema lengo la mpango huo ni kuwapa washiriki maarifa na stadi zitakazowawezesha kujiajiri au kupata ajira zenye tija.
Aidha, amesisitiza kuwa fedha ambazo baadhi ya vijana huzitumia katika shughuli zisizo na manufaa zinaweza kuelekezwa katika kujifunza ujuzi unaoweza kubadilisha maisha yao na kuwaondoa kwenye mzunguko wa umaskini.
Kiongozi huyo pia amewataka wananchi kushiriki kikamilifu katika kuleta maendeleo ya Chaani kwa kutumia uwezo, juhudi na ubunifu wao wenyewe, badala ya kutegemea misaada au zawadi za kisiasa.
Kwa mujibu wake, maendeleo ya kudumu yanapatikana kupitia elimu, kazi, uwajibikaji na ushirikiano wa jamii. Vilevile, ametoa wito kwa wakazi kudumisha amani na mshikamano, kujiepusha na vitendo vya vurugu, na kushiriki katika shughuli zinazokuza maendeleo ya kijamii na kiuchumi.
Mafunzo hayo yanatarajiwa kuanza katika siku chache zijazo, huku waandalizi wakiwahimiza vijana na watu wazima wenye nia ya kuongeza ujuzi wao kutumia fursa hiyo ili kuboresha maisha yao na kuchangia maendeleo ya jamii.
