Viongozi katika Kaunti ya Kilifi wameitaka serikali kuharakisha malipo ya fidia kwa wamiliki wa ardhi na wakazi walioathirika na mradi wa upanuzi wa Uwanja wa Ndege wa Kimataifa wa Malindi, wakisema hatua hiyo itafungua njia ya kukamilika kwa mradi huo na kuimarisha sekta ya utalii katika Pwani ya Kaskazini.
Viongozi hao pia wameitaka serikali kutekeleza ahadi ya kufungua Chuo cha Utalii cha Ronald Ngala mwezi Septemba, kama ilivyotangazwa na Katibu Mkuu wa Idara ya Utalii, Julius Bitok.
Akizungumza mjini Malindi, Seneta wa Kilifi, Stewart Madzayo, alisema ni wakati wa serikali kutekeleza ahadi zake ili miradi hiyo iweze kuwanufaisha wakazi wa eneo hilo.
“Tunataka kuhakikishiwa kuwa yale yote ambayo serikali imetangaza yatatekelezwa kwa vitendo. Tumengoja kwa muda mrefu kuanza kwa shughuli za Chuo cha Utalii cha Ronald Ngala. Ikiwa Katibu Mkuu amesema wanafunzi wa kwanza wataanza masomo mwezi Septemba, basi iwe hivyo,” alisema Madzayo.
Seneta huyo alisisitiza kuwa serikali inapaswa kuwalipa fidia kwa wakati wamiliki wa ardhi na wakazi walioathirika ili kutoa nafasi kwa upanuzi wa uwanja huo.
“Wamiliki wa ardhi na wakazi walioathirika wanapaswa kulipwa fidia haraka ili upanuzi wa uwanja wa ndege ufikiwe na Malindi iweze kupokea ndege kubwa za kimataifa,” aliongeza.
Kwa mujibu wa viongozi hao, kucheleweshwa kwa mradi huo kumeathiri ukuaji wa sekta ya utalii na kupunguza fursa za uwekezaji katika eneo hilo.
Mbunge wa Malindi, Amina Mnyazi, alisema kukamilika kwa upanuzi wa uwanja wa ndege kutafungua fursa mpya za kiuchumi na kuongeza idadi ya watalii wanaotembelea Malindi na maeneo ya Pwani ya Kaskazini.
“Utalii ndio uti wa mgongo wa uchumi wa Malindi. Bila uwanja wa ndege unaokidhi viwango vya kimataifa, tunapoteza watalii na wawekezaji ambao wangesaidia kukuza uchumi wa eneo hili,” alisema Mnyazi.
Wakazi walioathirika wanadai fidia ya takriban Shilingi bilioni 2.5, wakisema mchakato huo umecheleweshwa kwa zaidi ya miaka 15. Mwaka 2015, wakazi 230 walilipwa Shilingi milioni 423 na Mamlaka ya Viwanja vya Ndege Kenya (KAA) kama fidia ya majengo yaliyokuwa kwenye eneo la mradi, huku suala la fidia ya ardhi likiendelea kusikilizwa mahakamani.
Naye Meneja Mkuu wa Ocean Beach Resort and Spa na Mwenyekiti wa Chama cha Wamiliki wa Hoteli na Wahudumu wa Upishi Kanda ya Pwani ya Kaskazini, Maureen Awuor, alisema kukamilika kwa mradi huo kutaimarisha ushindani wa Malindi kama kitovu cha utalii.
“Malindi na Mambrui vina vivutio vipya vya utalii vinavyoweza kuvutia wageni wengi zaidi. Miundombinu bora ya usafiri wa anga itafungua fursa kubwa kwa sekta ya hoteli na biashara nyingine zinazotegemea utalii,” alisema Awuor.
Kwa upande wake, Mkurugenzi Mkuu wa Bodi ya Utalii Kenya (KTB), June Chepkemei, alisema ushirikiano kati ya serikali na sekta binafsi utaendelea kuwa msingi wa kukuza utalii nchini.
“Tutaendelea kushirikiana na sekta binafsi, taasisi za elimu na wadau wengine ili kuimarisha uratibu wa shughuli za utalii na kuhakikisha Kenya inanufaika zaidi na ongezeko la watalii wa ndani na wa kimataifa,” alisema Chepkemei.
Viongozi hao sasa wanaitaka serikali kuharakisha malipo ya fidia na utekelezaji wa miradi hiyo, wakisema kukamilika kwa upanuzi wa Uwanja wa Ndege wa Kimataifa wa Malindi pamoja na kuanza kwa shughuli za Chuo cha Utalii cha Ronald Ngala kutachochea ukuaji wa uchumi na kuimarisha sekta ya utalii katika Pwani ya Kaskazini.
